`Serikali ibadili sharti la ardhi shule binafsi’

Na Mwandishi wetu

SERIKALI imeshauriwa kubadili sharti la mtu anayetaka kujenga shule binafsi kuwa  na ukubwa wa ekari tatu kutokana na sharti hilo kuwa kikwazo kwa Watanzania wenye mtaji mdogo kushindwa kumiliki shule.

Mwenyekiti wa Bodi ya Shule binafsi ya Decent English Medium, Baraka Koka, akipandisha bendera ya Taifa baada ya kutembelewa na waandishi wa habari hivi karibuni

Ushauri huo ulitolewa na Mwenyekiti wa Bodi ya Shule binafsi ya Decent English Medium iliyopo eneo la Buyuni mtaa wa Mgeule Juu, Kata ya Buyuni Ilala jijini Dar es Salaam, Baraka Koka wakati akizungumza na waandishi wa habari waliotembelea maendeleo ya elimu katika kata hiyo.

Alisema sharti hilo la serikali ni mpango mzuri wenye nia ya kupunguza msongamano wa wanafunzi darasani ingawa ni muhimu sharti hilo kutazamwa upya hasa maeneo ya mijini ikiwa ni pamoja na kupunguza kutoka umiliki wa akari tatu kuwa angalau ekari mbili.

 

“Sisi hatupingi uamuzi huu, ila tunaiomba serikali yetu sikivu kubadili sharti hili kutokana na bei kubwa na gharama za umiliki wa ardhi kwa maeneo ya mijini. Sisi tunaamini kwamba kiwanja cha ukubwa wa ekari mbili ikikiwa na mchoro mzuri yanapatikana madaraka makubwa ya kutosha  ya idadi  ya wanafunzi 45 kwa darasa kulingana na takwa la sera,”alisema.

Alifafanua kuwa umiliki wa ekari mbili utatoa fursa zaidi kwa  Watanzania  ambao wameshindwa kununua ardhi, kumudu gharama za  kupima licha ya  kuwa na shauku ya kusaidia juhudi za serikali za kuongeza wasomi na kuondoa tatizo la ujinga hapa nchini.

Mwalimu mkuu msaidizi wa shule hiyo, Twamilway Kidala alisema shule yake imefanikiwa kutimiza sharti la kisera la kutumia mtaala wa Tanzania kufundishia.

Alisema kitaalamu mitaala huandaliwa kulingana na mazingira ya  taifa husika ingawa suala hilo limekuwa likipuuzwa na shule nyingi binafsi kutumia mtaala wa nje kufundisha jambo ambalo huweza kumuathiri mwanafunzi pindi mzazi anaposhindwa kumudu kulipa ada hadi mwisho wa masomo au elimu ya ngazi husika.

 

 

 

“Sisi tumeweza kutimiza wajibu huu wa kisera na kumekuwa na mapokeo mazuri kwa wazazi…tunawapokea wanafunzi wa ngazi zote bila kujali hali ya kipato cha mazazi ikiwamo kugharamia ada kwa wanafunzi yatima, kwasasa tuna gharamia mwanafunzi mmoja yatima,”alisema.

Alisema  shule yake ina madarasa ya kutosha, magari ya shule, jengo la utawala na mpango ni kujenga jengo kubwa la ghorofa  ili kuongeza madarasa na idara mbalimbali.

“Uongozi wa shule tunawakaribisha wazazi kuleta watoto wao kusoma hapa na kwa muda mfupi watabaini tofauti yetu kitaaluma, kimaadili kulinganisha na maeneo mengine,”alisisitiza Kidala.

 

Shule ya Decent English Medium  ni mojawapo kati ya shule zenye mzingira mazuri, eneo kubwa, viwanja vya michezo na mandhari ya kuvutia yanayomfanya mwanafunzi kusoma kwa utulivu na kuelewa.

JIUNGE NASI , BONYEZA HAPA http://www.wabunifumedia.blogspot.com ku-install App ya wabunifumedia,  bila ya kuingia website
Tweet@wabunifumediaonline, youtube@wabunifumediaonline TV, Fb@wabunifumediaonline, insta@wabunifumediaonline