Daraja lakwamisha elimu, biashara Buyuni

Na Odrian Nicolaus, WM (TSJ)

UKOSEFU wa daraja katika bonde la mto Mzumbi unaonganisha mtaa wa Mgeule Juu kata ya Buyuni na maeneo mengine ya manispaa ya Ilala Jijini Dar es Salaam imetajwa kuwa chanzo cha kusuasua kwa maendeleo ya elimu na uchumi katika mtaa huo.

Bonde la mto Mzumbi unaonganisha mtaa wa Mgeule Juu kata ya Buyuni na maeneo mengine ya manispaa ya Ilala Jijini Dar es Salaam

 

Wakizungumza na waandishi wa habari waliokuwa kwenye ziara ya kikazi ya kutembelea miradi ya maendeleo mtaani humo hivi karibuni, baadhi ya wakazi wa eneo hilo walisema wanafunzi wamekuwa wakikatisha masomo msimu wote wa mvua kwa kushindwa kuvuka mto huo kwenda shule.

Mmoja wa wakazi hao, Anastazia Marandu alisema kutokana na eneo hilo kutokuwa na shule ya msingi na sekondari inawalazimu wanafunzi kutembea umbali wa kilometa nne huku wakilazimika kuvuka mto huo ambao hujaa msimu wa mvua.

“Maji hujaa na kufikia kimo cha mita mbili hadi mbili na nusu kwenda juu. Huwalazimu watoto kutokwenda shule, hadi msimu umalizike.  Ikumbukwe kwamba hakuna njia mbadala. Ni muhimu kuwa na daraja mahala hapa,”alisema.

 Naye Salum Tupa aliongeza kwa kusema kuwa shughuli nyingine kama vile biashara pia hukwama wakati wa msimu  hata kama  msimu huo utadumu kwa mvua kwa miezi mitatu mfululizo.

“Wakati mwingine kama hukununua chakula cha kutosha ndani, lazima usaidiwe na majirani. Mto huanzia Morogoro kupitia Kisarawe mkoani Pwani, hivyo maji yake hujaa na kuchukua muda mrefu kupungua au kukauka, kusababisha watu kushindwa kuvuka upande wa pili wa Buyuni CCM ambako tunapata mahitaji,”alisema.

Mjumbe wa kamati ya maendeleo ya serikali ya mtaa huo, Baraka Koka alisema uongozi wa mtaa huo ulifikisha kero hiyo kwa Diwani wa kata hiyo na kuahidi kulijadili kwenye kamati ya maendeleo ya kata (WDC) ili maamuzi hayo yafikishwe kwa Mkurugenzi wa Manispaa kwa lengo la kupata kivuko au daraja.

“Sina hakika kama suala hili lilijadiliwa na ngazi ya juu na ufumbuzi wake ni nini kwasababu hakuna juhudi zozote zinazonekana kumaliza kero hii,”alisema,

Akifafanua kuhusu kero hizo, Mkuu wa wilaya ya Ilala, Sophia Mjema alisema serikali wilayani humo imeanza hatua za kuyabaini maeneo yenye kero mbalimbali ikiwamo pembezoni  mwa Ilala.

 Kutokana na  hayo Bi Sophia aliwaomba wananchi wa wilaya yake ya Ilala. Kuwa wavumilivu wakati wakiyafanyia kazi matatizo yanayowakabili katika maeneo.

Katika ziara hiyo ya waandishi wa habari wa taasisi ya kihabari ya Wabunifu (WM) na ile ya waandishi wa habari za uwazi na uchunguzi, Sauti ya Wasiokuwa na Sauti Vijijini (TTAJA) walibaini barabara kuu ya kuingia mtaa huo ikiwa na mashimo ya kutisha huku daraja la kienyeji lililojengwa kwa magogo ya mti wa mnazi likiwa limesombwa na maji na hivyo kukosekana kwa mawasiliano kati ya wananchi hao na maeneo mengine ya jijini.

JIUNGE NASI , BONYEZA HAPA http://www.wabunifumedia.blogspot.com ku-install App ya wabunifumedia,  bila ya kuingia website
Tweet@wabunifumediaonline, youtube@wabunifumediaonline TV, Fb@wabunifumediaonline, insta@wabunifumediaonline